Өченче көн тоташ кар ява

Сара Садыйкова көе,
Мостай Кәрим сyзләре

Өченче көн җепшек кар ява,
Өченче көн тоташ, өченче көн
Әрни минем иске бер яра.
Өченче көн тоташ кар ява.

Тимер ярчык яра төбендә.
Тимер ярчык йөри тәнемдә.
Әйтерсең, карт гөнаһ иясе
Әйләнгәләп куя кабердә.
Шуңа күрә әрни ул яра:
Өченче көн тоташ кар ява.

Икебезгә тиде берьюлы
Бер минаның ике ярчыгы.
Берсе калды сержант Фоминда,
Икенчесе — минем тәнемдә.

Карлар эрер, җылы җил иссә,
Карлар китеп барыр, яз килсә;
Бәлки үчем кимер дошманга,
Тәнемдәге тимер эресә.
Унтугыз ел әрни ул яра,
Өченче көн тоташ кар ява.

Öçençe kön totaş kar java

Sara Sadïjkova köe,
Mostaj Kärim süzläre

Öçençe kön cepşek kar java,
Öçençe kön totaş, öçençe kön
Ärni minem iske ber jara.
Öçençe kön totaş kar java.

Timer jarçïk jara töbendä.
Timer jarçïk jöri tänemdä.
Äjterseñ, kart gönah ijase
Äjlängäläp kuja kaberdä.
Şuña kürä ärni ul jara:
Öçençe kön totaş kar java.

Ikebezgä tide ber’julï
Ber minanïñ ike jarçïgï.
Berse kaldï serzhant Fominda,
Ikençese — minem tänemdä.

Karlar ěrer, cïlï cil issä,
Karlar kitep barïr, jaz kilsä;
Bälki üçem kimer doşmanga,
Tänemdäge timer ěresä.
Untugïz el ärni ul jara,
Öçençe kön totaş kar java.